Улсын Филармонийн 50 жил, Морин хуурын чуулгын 30 жилийн ойн хүрээнд Морин хуурын чуулгын шилдэг уран бүтээлүүдээс бүрдсэн “НАРАН МЭЛМИЙТ ЭХ ОРОН” аялан тоглолт баруун 4 аймгуудаар үзэгч сонсогч бүхэндээ тоглолтоо толилуулаад ирлээ.
Баянхонгор Хөгжимт драмын театрт 04 сарын 22 Ховд Хөгжимт драмын театрт 04 сарын 24 Говь-Алтай Ардын дуу бүжгийн Алтай чуулгад 04 сарын 27 Өвөрхангай Хөгжимт драмын театрт 04 сарын 30-нд “Наран мэлмийт эх орон” тоглолтоо тус тус аймгийн уран бүтээлчидтэй хамтран уран бүтээлээ толилуулж, арга зүйн заавар зөвлөгөө өгч хамтран ажиллаа.
Түүнчлэн Улсын Филармонийн Морин хуурын чуулга нь тоглолтоос гадна нийгмийн хариуцлагын хүрээнд:
Ховд аймгийн Чандмань сумын “Хөөмийн ордон”-нд хүндэтгэл үзүүлж тухайн сумын нийт иргэдэд үнэ төлбөргүй тоглолтоо толилуулсан. Баянхонгор аймгийн Өлзийт суманд хэрэгжиж буй үндэсний урлагийг сурталчлах, өвлөн уламжлуулах зорилтот үйл ажиллагааг дэмжин тоглолтоо сонордуулж тухайн тоглолтын орлогыг хандивласан. Өвөрхангай аймгийн Хөгжимт драмын уран бүтээлчидтэйгээ хамтдаа мод тарив. Говь-Алтай аймгийн Ерөнхий боловсролын дунд сургуулийн ахлах ангийн 500 гаруй сурагчдад үндэсний урлагийн хөгжмийн тайлбар концертыг Улсын Филармонийн “Хөгжмийг хүн бүрт” хөтөлбөрийн хүрээнд аймгийн Соёл урлагийн газар, Ардын дуу бүжгийн Алтай чуулгатай хамтран зохион байгуулсан.
Аялан тоглолтоо хийхэд хамтран ажиллаж, туслалцаа дэмжлэг үзүүлсэн аймаг бүрийн Соёл урлагийн газар, Театр, Чуулга, албан байгууллага, Шунхлай ХХК-ийн хамт олонд Морин хуурын чуулгын уран бүтээлчид болон Улсын Филармонийн нийт хамт олны зүгээс гүнээ талархал илэрхийлж байна
